O domingo anterior ao inicio de Pinchanogrove, organizamos un chamativo e divertido partido de fútbol sala entre camareiros e cociñeiros dos locais participantes, e así vanse poñendo en forma para as dúas semanas do concurso. Os dous equipos xogan coa clásica indumentaria da súa profesión, e para poñer orde na típica rivalidade entre camareiros e cociñeiros, intenta arbitrar este partido nin máis nin menos que “Abel-to Chicote” (que non é unha mezcla entre o alcalde de Vigo e Alberto Chicote, é “Abel Óscar” de Taberna Casa Abel).
Se o partido é curioso, o tipo de arbitraxe non o veremos nin na final da Champions, nin na final dun torneo de barrio. Aquí non se castiga con tarxetas, “Abel-to Chicote” tómase moi en serio a súa profesión e castiga con comandas a discreción para camareiros e cociñeiros. Pero as accións sancionables tamén teñen tela xa que se basean máis na hostalería que no fútbol sala, por exemplo: pelos por fóra do gorro, paxariña mal colocada, carné de manipulador de alimentos caducado… e cada vez que o árbitro ve algunha infracción deste tipo, o castigado ten que preparar o pedido e servirllo ao público, que está encantado de recibir nas gradas as bebidas e pinchos que lles serven os sancionados. O público ademais de saír merendado do pavillón, tamén se pode levar uns cuantos regalos, xa que no descanso realízanse xogos e sorteos.
